KUJTIMI

Kujtimi është një komedi sipas poetikës postdramatike. Në të flitet për Shpresën që mbetet edhe kur Kujtimi vdes. Nostalgjia për teatrin e kthen besimin në mundësinë e rimëkëmbjes së tij, mirëpo kjo sot mund të ndodhë vetëm me ndihmën e patericave të estradës. Prandaj, kjo komedi, që ka diçka tragjike brenda, përfundon me ‘ringjallje’ dhe tallava.

Kjo komedi e Stefan Çapalikut është specifike për nga strukturimi postdramatik dhe relacionet intertekstuale (me Shekspirin dhe Pirandelon), si dhe ato intratekstuale (me librin e tij në prozë, Tregimet e tranzicionit). Drama ka marrë fund, teatri ka marrë fund, ka mbetur vetëm kujtimi si një lloj kufome që ‘mbijeton’ nëpërmjet premtimeve të politikanëve dhe shfaqjeve estradeske.