MBROJTJA E HEKUBËS

Poezia e Lindita Ahmetit karakterizohet nga niveli i lartë i figurshmërisë, nivel i cili shtrihet dhe formësohet brenda një rrjeti të gjerë referencash. Këto referenca, në vija të trasha, ndahen në tri lloje: 1. referenca nga mitologjia, 2. referenca nga historia dhe 3. referenca nga kultura. Lindita e njeh rëndësinë e gjuhës dhe vizioni i cili “përvidhet” në disa vargje të poezive të saj është i lidhur ngushtë me gjuhën si qenie, vizion i cili pashmangshëm na e kujton atë që e thotë filozofi gjerman, Martin Heidegger, se qenia banon në gjuhë, prandaj jo rastësisht në disa vargje e gjejmë të shkruar gjuhën e vjetër shqipe me klenë a mos me klenë dhe jo rastësisht nëpër vargje janë të përmendur rilindasit si Naimi e De Rada.