HARMONIA MJEDISORE

Ardita Byci Jakupi është arkitekte-urbaniste, studiuese psiko-hapësinore dhe profesoreshë në Fakultetin e Arkitekturës pranë Universitetit të Prishtinës, me profil profesional të pasur me angazhim praktik. Interesat e saj kërkimore përfshijnë: dizajnin shqisor, dizajnin e peizazhit, dizajnin me pjesëmarrje, fenomenologjinë dhe teorinë kritike hapësinore.
Ajo është e fokusuar në eksplorimin e kryqëzimit të teorisë dhe praktikës, duke theksuar veçanërisht marrëdhënien njeri-mjedis, përmes trajtimit të mjedisit në kontekstin ndijor dhe psikologjik.

Të dhëna për librin:

Për mijëra vjet, njerëzit janë përpjekur ta njohin dhe ta kuptojnë domethënien e hapësirës përmes konfigurimeve të ndryshme. Ata ndërtuan peizazhe, shpikën koncepte të ndryshme, vetëm për ta interpretuar një lloj harmonie. Secili nga këto koncepte ka pasur një rol në prodhimin e një efekti të veçantë që ka të bëjë me tendencën për ta krijuar një mjedis të këndshëm. Për këtë u përdorën edhe dukuritë natyrore, ndikimet e planetëve, Diellit dhe Hënës, vetëm për të krijuar mjedise ideale të jetesës. Të gjitha këto peizazhe arkitekturale mbeten si shenjë e qytetërimeve të ndryshme dhe e mjediseve të tyre.

“Harmonia Mjedisore”, ndonëse në fushën e arkitekturës dhe urbanizmit njihet si koncept që përshkruan qëndrueshmërinë në kontekstin ekonomik, social dhe mjedisor, ndërsa në këtë libër paraqitet si një koncept më i avancuar, përmes një ndërthurjeje më të thellë me estetikën, psikologjinë dhe marrëdhëniet njerëzore me natyrën. Në kontekst të këtij koncepti, “harmonia” duhet të kuptohet si një cilësi e plotnisë, që përfshin komponentin fizik, intelektual, estetik, shpirtëror dhe artistik, një cilësi kjo që shkon përtej mundësive të matjeve – një trekëndësh midis mendjes, shpirtit dhe trupit. Ndërsa “mjedisi” nënkupton mjedisin e ndërtuar dhe natyror në nivel urban dhe arkitektural.