REBELIM DHE KUJTESË

Libri Rebelim dhe kujtesë i Ardianë Pajazitit sjell nëntë portrete, nëntë zëra dhe nëntë fate të grave që kanë sfiduar një mentalitet, kanë kundërshtuar një regjim, apo kanë dhënë shembuj suksesi, mbijetese, dashurie dhe përkushtimi. Ky libër, duke prezantuar nëntë histori grash nga perspektiva e tyre dhe me zërin e tyre, frymëzon dhe inkurajon brezat.
Në fakt, ky nuk është thjesht një libër me nëntë biseda, por një material potencial për nëntë filma. Historitë e këtij libri dëgjohen, lexohen, shikohen dhe përjetohen. Ato janë nëntë histori të veçanta dhe interesante për ta kuptuar një kohë, një mendësi, një mosdorëzim. Historia e dhjetë është ajo që mund të lexohet në përzgjedhjen e tyre, në përshkrimet para dhe pas fjalëve të protagonisteve, si dhe mes rreshtave; është historia e vetë autores së librit që është kujtuar t’i regjistrojë me kujdes dhe respekt këto gra, ashtu siç regjistrohen zërat e përmallimit dhe sakrificës, apo zërat që s’kanë heshtur në të kaluarën dhe që s’mund t’i heshtë as e ardhmja.